'जून' चित्रपटातील 'बाबा' गाण्याचं रिप्राईज व्हर्जन प्रेक्षकांच्या भेटीला येत आहे. आपल्या सगळ्यांच्याच आयुष्यातील या 'सुपरहीरो'ला 'फादर्स डे' च्या निमित्ताने एक अनोखी भेट देण्याचा प्रयत्न 'जून' चित्रपटाच्या टीमने आणि 'प्लॅनेट मराठी'च्या वतीने करण्यात आला आहे.

बाबा… आपल्या सर्वांच्या आयुष्यातील एक अशी व्यक्ती, जे आपल्या पाल्याला खूश ठेवण्यासाठी, त्याचे भविष्य घडवण्यासाठी सर्वोतोपरी प्रयत्न करतात. प्रसंगी काही गोष्टींचा त्यागही करतात. स्वावलंबी होण्यासाठी काही गोष्टींची जबाबदारी घेण्यास सांगतात तर कठीण काळात ठामपणे पाठीशी उभेही राहतात. आपल्याला आधार देणारे, सोबत चालणारे आणि योग्य मार्ग दाखवणारे आपले बाबा प्रत्येकासाठीच सुपरहिरो असतात. आपल्या सगळ्यांच्याच आयुष्यातील या ‘सुपरहीरो’ला ‘फादर्स डे’ च्या निमित्ताने एक अनोखी भेट देण्याचा प्रयत्न ‘जून’ चित्रपटाच्या टीमने आणि ‘प्लॅनेट मराठी’च्या वतीने करण्यात आला आहे.

‘जून’ चित्रपटातील ‘बाबा’ गाण्याचं रिप्राईज व्हर्जन प्रेक्षकांच्या भेटीला येत आहे. निखिल महाजन यांनी शब्दबद्ध केलेल्या या गाण्याला शाल्मलीने संगीत दिले आहे. आणि गायीका आहेत आनंदी जोशी. या गाण्यात नेहा पेंडसे बायस, शाल्मली, आनंदी जोशी, रेशम श्रीवर्धन यांच्यासोबत सिनेसृष्टीतील अमृता खानविलकर, प्रिया बापट, गिरीजा ओक गोडबोले, मृण्मयी गोडबोले, पर्ण पेठे, गौरा नलावडे, संस्कृती बालगुडे या मैत्रिणींचीही या गाण्याला साथ लाभली आहे.

‘बाबा’विषयी भावना व्यक्त करताना शाल्मली म्हणते,”आपण अनेकदा वडिलांना द्यायला हवे तितके महत्व देत नाही. जेव्हाजेव्हा मी हे गीत ऐकते तेव्हा तेव्हा मी कृतज्ञतेने भारावून जाते. मला खात्री आहे, की अशीच भावना प्रेक्षकांचीही असेल.

“या गाण्याविषयी आणि आपल्या बाबांविषयी निर्माती, अभिनेत्री नेहा पेंडसे बायस सांगते,”आयुष्यात भरभराट होण्यासाठी ज्या गोष्टींची आवश्यकता असते. जसे सचोटी, चिकाटी, प्रामाणिकपणा, तत्त्वे, मूल्ये हे सगळे गुण माझ्या बाबांमुळेच माझ्यात आले. माझे बाबा मितभाषी आहेत. त्यामुळे त्यांच्या कृत्यातून ह्या गोष्टी मला समजत गेल्या. मी नेहमीच त्यांना नैतिक मूल्ये जपून आयुष्य भरभराटीला नेताना पाहिलं आहे आणि म्हणूनच ते माझ्यासाठी आदर्श आहेत.

या गाण्याबद्दल चित्रपटाचे निर्माता आणि गीतकार निखिल महाजन म्हणतात, ” आपल्या आयुष्यातील ‘बाबा’ या खास व्यक्तीला हे गाणे ‘जून’ आणि ‘प्लॅनेट मराठी’च्या वतीने समर्पित करण्यात येत आहे आणि यासाठी ‘फादर्स डे’पेक्षा चांगला कोणता दिवस असूच शकत नाही. सिनेसृष्टीतील सुंदर आणि प्रतिभावान अभिनेत्री ‘बाबा’ या गाण्याशी जोडल्या गेल्या आहे. त्या सर्वांचे मी आभार मानतो.”

तर या गाण्याविषयी ‘प्लॅनेट मराठी’चे सीएमडी अक्षय बर्दापूरकर सांगतात, ”वडील ही आपल्या आयुष्यातील अशी व्यक्ती आहे, जी कधीच आपल्यासमोर व्यक्त होत नाही. प्रेम, माया, राग, तडजोड, आनंद, दुःख अशा सगळ्याच भावना व्यक्त न करता, मनात साठवून ते आपल्या घराचा आधारस्तंभ बनतात. या गाण्यात सहभागी झालेल्या माझ्या मैत्रिणींचेही मी ‘प्लॅनेट मराठी’तर्फे विशेष आभार मानतो.

सुप्री मीडियाचे शार्दूल सिंग बायस, नेहा पेंडसे बायस आणि ब्लू ड्रॉप प्रा. लि. चे निखिल महाजन आणि पवन मालू निर्मित, सुहृद गोडबोले आणि वैभव खिस्ती दिग्दर्शित ‘जून’ या चित्रपटात नेहा पेंडसे  बायस, सिद्धार्थ मेनन, किरण करमरकर, रेशम श्रीवर्धन, निलेश दिवेकर यांच्या प्रमुख भूमिका आहेत. ‘प्लॅनेट मराठी’ ओटीटीवर ‘जून’ लवकरच प्रेक्षकांच्या भेटीला येणार आहे.

J